Кыайыы 70 сылын көрсө

Хайыһар десана тохсус төгүлүн айаҥҥа турунна

Бэрдьигэстээх орто оскуолатыгар сылын аайы үгэскэ кубулуйбут хайыһар десана быйыл тохсус төгүлүн айаҥҥа турунна. Бу быйылгы хайыһарынан сүүрүү Улуу Кыайыы 70 сылыгар ананна. Сыала-соруга диэн оҕону эт-хаан өттүнэн сайдыылаах буоларыгар, чөл туруктаах, спорт биир кыраһыабай көрүҥэр хайыһарга интэриэһи үөскэтии, аҕа көлүөнэ дьон дьоруойдуу быһыыларын утумнааһын буолар.

Ол курдук, муус устар 10 күнүгэр ыытыллыбыт хайыһар десаныгар отучча үөрэнээччи уонна алта учуутал кыттыыны ыллылар. Сарсыарда 9 чааска Ильмень күөл кыргыһыытын кыттыылаахтарыгар ананан тутуллубут сквер аттыгар атаарыы церемонията буолла. Ол кэннэ сүүрүү кыттыылаахтара айаҥҥа туруммуттара. Айаммыт сыалынан Күөрэлээххэ тиийэн оскуола оҕолорун кытары көрсүһүү этэ. Аһымаҕа диэри автобуһунан айаннаан тиийэн баран хайыһар кэтэн айаҥҥа туруммуттара. Уһун-киэҥ айаны айаннаан тиийиэхтээх сирбитигэр тиийдибит. Күөрэлээххэ киириибитигэр биһигини оҕолор эрэ буолбакка, олохтоохтор эмиэ кэтэспит этилэр. Оскуолаҕа тиийбиппитигэр улахан көрсүһүү буолла, кылаас чаастара, эҕэрдэ концерт, сыал ытыыга күрэхтэһии, Степан Ковров туһунан кэпсээтилэр, билиһиннэрдилэр.

Бу тэрээһин туһунан кэпсииригэр көрдөстүм дириэктэри иитии чааһыгар солбуйааччыттан Тарасов В.Е.

- Хайыһарынан сүүрүү биһиэхэ быйыл тохсус төгүлүн ыытыллар. Сылын аайы оҕолор кыттыылара элбээн иһэр. Быйыл экзаменнаах 9,11 кылаас үөрэнээччилэрин ыла сатаабатыбыт. Сүрүн сыалбытынан хайыһар спордун пропагандалааһын, чөл олоҕу өрө туту буолар. Бу тэрээһин сыл аайы араас соруктаах ыытыллар, холобур быйылгы сүүрүү Кыайыы 70 сылыгар ананна.

Бырайыак ааптара Осипова Нина Ивановна бу курдук санаатын үллэһиннэ:

- Бу «хайыһар десана» биһиги оскуолабытыгар 2007 сыллаахтан үгэс быһыытынан ыытыллар. Биһиги улууспут нэһилиэгин үксүн кэрийдибит. Мытаахха, Солоҕоҥҥо, Кэптиҥҥэ, Күөрэлээххэ хаһыс да сырыыбытын сырыттыбыт. Манна оҕолор кытталларын наһаа сөбүлүүллэр, сибиэһэй салгынынан тыыналлар, 30-ча километры сүүрэр кыахтарын бэйэлэрэ холонон көрөн астыналлар. Маннык тэрээһиннэргэ оҕо бодоруһар дьоҕура сайдар, атын оскуола оҕолорун кытары билсэр, доҕордоһор. Онон оҕолорго наһаа улахан суолталаах дии саныыбын. Биһиги десаммыт бэйэтэ туһунан сыаллаах-соруктаах буолар. Холобур, бэйэбит улууспут биллиилээх дьоннорун, суруйааччыларын, поэттарын уонна аҕа дойду сэриитин кыттыылаахтарын билсэбит, төрөөбүт сирдэригэр, музейдарга сылдьабыт. Бу биһиги оскуолабыт бырайыагар атын оскуолалар эмиэ кыттыһан, бары биир сомоҕо буолан элбэх километры сүүрэн барарбыт буоллар үчүгэй буолуох этэ. Онон биһиги ыҥырыыбытын өйүүллэригэр баҕарабын.

Салгыы кыттыбыт оҕолор бэйэлэрин санааларын эттилэр. Ол курдук, онус кылаас үөрэнээччитэ Мичилийэ Егорова маннык кэпсиир:

- Мин быйыл бастакыбын бу сүүрүүгэ кытынным. Манна кыттан олус элбэх позитивнай эмоцияны ыллым, эбии доҕоттордоннум. Бу буолан ааспыт түгэни мин үйэ-саас тухары саны сылдьыам, тоҕо диэтэххэ аҕа дойду сэриитин туһунан билиибин хаҥаттым, санаабын сайыннардым. Уонна уопсайынан эттэхпинэ, маннык тэрээһиннэр ыытыллаллара олус туһалаах доруобуйа эрэ өттүнэн буолбакка, киһиэхэ патриотическай санааны уһугуннараллар. Оҕолорго туһаайан этиэм этэ, бу хайыһарынан сүүрүүгэ сылдьар буолуҥ кэмсиниэххит суоҕа. Түгэнинэн туһанан биһигини илдьэ сылдьыбыт учууталларга, директорбытыгар Анджелика Альбертовнаҕа маннык тэрээһиннэри ыыталларын иһин улахан махталбын тиэрдэбин.

Ренат Платонов ситэрэн биэрэр: «Мин иккис сылбын сырыттым. Наһаа үчүгэй айылҕаҕа сылдьар, сибиэһэй салгынынан тыынар. Бэйэм сөбүлүүбүн хайыһардыырбын. Оҕолорго этиэм этэ сылын аайы сылдьыһыҥ, кыттыһыҥ диэн. Махталбын тиэрдэбин Тарасов В.Е., учууталларга, директорбытыгар уонна суоппарбытыгар. ГСМ өттүнэн көмө буолбут попечитель тэрилтэбитигэр ООО «Автодор «Горный» (сал. Иванов А.А.).  Ону таһынан биһигини үөрэ-көтө көрсүбүт Күөрэлээх орто оскуолатын коллективыгар уонна олохтоохторугар».

Дьэ бу курдук, Бэрдьигэстээх орто оскуолатын үөрэнээччилэрэ, учууталлара чөл туруктаах, доруобай оло5у өрө тутууга араас хабааннаах үлэлэри ыыталлар уонна атын улуус оскуолаларын ыҥырабыт.

Нарыйа Николаева

8 кылаас үөрэнээччитэ, юнкор